မြန်မာနိုင်ငံက တိုင်းရင်းသားဒေသတွေမှာ ရာဘာစိုက်ခင်းတွေအတွက် စီးပွားရေးလုပ်ငန်းရှင်တွေ၊ စစ်တပ်နဲ့ အစိုးရကမြေတွေ အကြီးအကျယ်သိမ်းယူခဲ့တယ်လို့ ဗြိတိန်အခြေစိုက် Global Witness သဘာဝပတ်ဝန်းကျင် ထိန်းသိမ်းရေးအဖွဲ့က မနေ့က အစီရင်ခံစာ ထုတ်ပြန်ခဲ့ပါတယ်။
ပြီးခဲ့တဲ့ ၁၀ နှစ်အတွင်း မြန်မာနိုင်ငံ အရှေ့မြောက်ပိုင်းဒေသမှာ မြေဧက ၅ သန်းကျော် ကို မူလစိုက်ပျိုးလုပ်ကိုင်နေသူတွေဆီက အဓမ္မသိမ်းယူပြီး၊ ရင်နှီးမြှုပ်နှံမယ့်လုပ်ငန်းရှင်တွေကို လုပ်ကိုင်ခွင့်ချပေးခဲ့ရာမှာ အသိမ်းခံမြေဧက လေးပုံတစ်ပုံကျော်ဟာ ရာဘာစိုက်ခင်းတွေ ဖြစ်သွားခဲ့တယ်လို့ အစီရင်ခံစာမှာ ဖေါ်ပြပါတယ်။
ရှမ်းပြည်နယ် အရှေ့မြောက်ပိုင်း တရုတ်နယ်စပ်အနီးဒေသမှာ Global Witness အဖွဲ့က တစ်နှစ်ခွဲကြာ လေ့လာစုံစမ်းခဲ့ရာမှာ ရွာပေါင်း ၁၁ ရွာက မြေသိမ်းခံရသူပေါင်း ၁၂၄ ယောက်၊ အစိုးရအရာရှိတွေ၊ အငြိမ်းစားစစ်တပ်အရာရှိဟောင်းတွေ၊ သတင်းထောက်တွေ၊ လယ်ယာမြေဆိုင်ရာ အကူအညီပေးနေသူတွေ စုစုပေါင်း ၂၀ ကျော်ကို တွေ့ဆုံမေးမြန်းခဲ့ပါတယ်။
လေ့လာချက်အရဒေသဆိုင်ရာ စစ်တပ်၊ ဒေသအစိုးရနဲ့ စီးပွားရေးကုမ္ပဏီတွေ ပူးပေါင်းပြီး ၂၀၀၆ ခုနှစ် ကတည်းက မြေတွေအကြီးအကျယ် သိမ်းယူခဲ့ကြောင်း၊ မြေအများဆုံးလုပ်ခွင့်ရသူက ရွှေဝတ်မှုန်ကုမ္ပဏီဖြစ်ပြီး၊ စုစုပေါင်း မြေဧက လေးထောင့်ခြောက်ရာကျော်မှာ ရာဘာတွေစိုက်ပျိုးခဲ့ကြောင်း၊ မြေသိမ်းခံတောင်သူ ၉၈ ရာနှုန်း လျော်ကြေး မရကြကြောင်း အစီရင်ခံစာမှာဖေါ်ပြထားပါတယ်။
နစ်နာကြတဲ့ တိုင်းရင်းသားဒေသခံတွေဟာ ရှမ်း၊ ပလောင်နဲ့ ကချင်တိုင်းရင်းသားတွေဖြစ်ကြပါတယ်။
မြန်မာနိုင်ငံက ရာဘာတွေဝယ်ယူနေကြတဲ့ နိုင်ငံတကာလုပ်ငန်းရှင်တွေအနေနဲ့ သူတို့ဝယ်ယူတဲ့ရာဘာကြောင့် အကျင့်ပျက်ခြစားမှုနဲ့ လူ့အခွင့်အရေးချိုးဖေါက်မှုတွေကို အားပေးရာရောက်မရောက်စုံစမ်းကြဖို့ Global Witness အဖွဲ့က တိုက်တွန်းလိုက်ပါတယ်။
RFA Burmese
http://www.rfa.org/burmese
0 comments:
Post a Comment