ဧရာဝတီတိုင်းဒေသမှ စိမ်းစားငါးပိ ထုတ်လုပ်သူ များက FDA က ခွင့်မပြုသည့် ဆိုးဆေးများကို လွန်ခဲ့သည့် အနှစ် ၃၀ ခန့်မှစ၍ အသုံးပြုလာခဲ့ကြကြောင်း၊ လက်ရှိအချိန်တွင် ပြောင်းလဲရန် အခက်အခဲများစွာ ရှိနေကြောင်း မြန်မာ့စားသုံးသူများသမဂ္ဂမှ အတွင်းရေးမှူး ဦးမောင်မောင်က News Watch ဂျာနယ်သို့ အောက်တိုဘာ ၆ ရက်တွင် ပြောကြားခဲ့သည်။
၎င်းက ''ဧရာဝတီတိုင်းက မျှင်ငါးပိထဲမှာ ဆိုးဆေးပါတဲ့ကိစ္စ။ ဒါကို ဘယ်လို ကင်းစင်အောင်လုပ်ကြမလဲဆိုတာ ထုတ်လုပ်သူတွေရယ်၊ FDA ရယ်၊ အရပ် ဘက်အဖွဲ့အစည်းရယ် အလုပ်ရုံဆွေးနွေးပွဲ လုပ်ကြတယ်။ မျှင်ငါးပိ ထဲမှာ ဆိုးဆေးပျောက်သွားအောင်လုပ် မယ်ပေါ့။ ဆိုးဆေးက တော်တော်လေး ဆိုးဆိုးရွားရွား ဖြစ်နေတယ်''ဟု ပြောကြားခဲ့သည်။ ယင်းဆွေးနွေးပွဲ၌ လုပ်ငန်းရှင်များက မျှင်ငါးပိများတွင် ဆိုးဆေးများ ထည့်သွင်းသည်မှာ လွန်ခဲ့သည့် အနှစ် ၃၀ ခန့်မှ အသုံးပြုခဲ့ခြင်းကြောင့် မိရိုးဖလာ ရိုးရာလုပ်ရိုးလုပ်စဉ်တခုပင်ဖြစ်နေကြောင်း ဆိုးဆေးမပါဘဲ ထုတ်လုပ်ရန် အခက်အခဲများစွာရှိကြောင်း ၀န်ခံပြောကြားခဲ့ကြောင်း ဦးမောင်မောင်က ပြောကြားခဲ့ သည်။
FDA က ခွင့်ပြုတဲ့ အစားအစာထဲမှာထည့်လို့ရတဲ့ ဆိုးဆေးဆိုတာရှိတယ်။ အခုဟာက ခွင့်မပြုတဲ့ ဆိုးဆေး ဆိုတာ စက်ရုံသုံး ဆိုးဆေးမျိုးတွေကို သူတို့တွေက ထည့်သုံးနေကြတာ။ သူတို့ပြောတာကတော့ ခွင့်ပြု ဆိုးဆေးကို ငါးပိထဲထည့်ကြည့်တာ အရောင်က မစွဲဘူးလို့ ပြောတယ်။ ဒါကြောင့် FDA ကခွင့်ပြုတဲ့ ဆေးက အသုံးမ၀င်ဘူး၊ သုံးမရဘူး။ ဒါနဲ့ ခွင့်မပြုတဲ့ဆေးကို သုံးလာကြတယ်။ မသုံးပြန်ရင်လည်း ဈေးကွက်က မ၀ယ် ဘူး။ ဥပမာ ဆိုးဆေးအန္တရာယ်ကို နားလည်တဲ့ ဧရာဝတီတိုင်းက မစားပေမယ့် တနိုင်ငံလုံး ဖြန့်ရတဲ့ဟာမျိုး ဆိုရင် ကုန်သည်က မယူဘူး။ အဲဒီကိစ္စတွေ ဆွေးနွေးဖြစ်တာပါ''ဟု ဆိုသည်။ ယင်းကဲ့သို့ ထုတ်လုပ်သူများက ဆိုးဆေးအန္တရာယ်ကို သိသော်လည်း ဈေးကွက်၏ တောင်းဆိုမှုအရ မဖြစ်မနေ ထည့်သုံးနေရကြောင်း၊ ယင်းအတွက် ငါးပိထုတ်လုပ်သူများ၊ FDA နှင့် အရပ်ဘက်အဖွဲ့အစည်းများ ညှိနှိုင်းအဖြေရှာမှုများ ပြုလုပ်ခြင်းဖြစ် ကြောင်း ဆိုသည်။
''လောလောဆယ်တော့ အဖြေမတွေ့သေးဘူး။ ဒါပေမဲ့ နောက်အလုပ်ရုံဆွေးနွေးပွဲတခုမှာ တော့ အဖြေထွက်မယ်လို့ ယုံကြည်တယ်။ နောက်အလုပ်ရုံဆွေးနွေးပွဲက ဒီဇင်ဘာ ပထမအပတ်မှာ လုပ်မယ်လို့ သဘောတူခဲ့တယ်။ ကျွန်တော်တို့ အရပ်ဘက်အဖွဲ့အစည်းကတော့ တာဝန်ရှိသူပြောတာတွေရော၊ လုပ်ငန်းရှင် ပြောတာတွေရော နားထောင်ပေးပြီး အကြံပြုအဖြေရှာပေးနိုင်မယ်လို့ ယုံကြည်ပါတယ်''ဟု ပြောကြားခဲ့သည်။ ယင်းအလုပ်ရုံဆွေးနွေးပွဲအား အောက်တိုဘာ ၆ ရက်၌ ဧရာဝတီတိုင်းဒေသကြီး ပုသိမ်မြို့တွင် ပြုလုပ်ခဲ့ကြောင်း သိရသည်။
ကိုခက်
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal
About Editor
0 comments:
Post a Comment