ရှမ်းမြောက်ပိုင်းတွင် ဖြစ်ပွားခဲ့သော ဗုံးပေါက်ကွဲမှုများကြောင့် လားရှိုးမြို့တွင် လုံခြုံရေး တိုးမြှင့်ဆောင်ရွက် လျက်ရှိကြောင်း ရှမ်းပြည်နယ် ဒုတိယပြည်နယ် ရဲတပ်ဖွဲ့မှူးရုံးမှ သိရှိရသည်။
လားရှိုး၌ ပိတ်ဆို့ရှာဖွေမှု ၄ နေရာပြုလုပ်ခဲ့ပြီး လက်ရှိတွင် ပိတ်ဆို့ရှာဖွေရေးကို ၁၂ နေရာအထိ ဆောင်ရွက်နေကာ အင်အားအနေဖြင့် တိုးမြှင့်ချထားပေးကြောင်း ပြည်နယ် ဒုတိယရဲတပ်ဖွဲ့မှူးရုံးမှ ရဲမှူးကြီး အောင်မြတ်မိုးက ပြောသည်။
ရှမ်းပြည်နယ် မြောက်ပိုင်းတွင် တိုင်းရင်းသား လက်နက်ကိုင် တပ်ပေါင်းစုများနှင့် မြန်မာ့တပ်မတော်တို့အကြား ဖြစ်ပွားသော တိုက်ပွဲများကြောင့် လက်နက်ကိုင် အဖွဲ့များက ရှမ်းပြည်နယ် မြောက်ပိုင်းအတွင်းရှိ မြို့နယ်များသို့ ဝင်ရောက်လာကာ အများပြည်သူ ထိတ်လန့်စေရန် ဖောက်ခွဲရေး အလုပ်ငန်းများ လုပ်ဆောင်လာနိုင်သည့် အတွက် လုံခြုံရေး တိုးမြှင့်ထားခြင်းဖြစ်ကြောင်း သိရသည်။
“လားရှိုးမြို့ဝန်းကျင်မှာ တပ်မတော်ကလည်း စစ်ကြောင်းတွေ လှည့်လည် ရှင်းလင်းဆောင်ရွက် ပေးနေပါတယ်။ ရဲတပ်ဖွဲ့ဝင်တွေကလည်း လားရှိုးမြို့ အပါအဝင် ရှမ်းမြောက်မှာရှိတဲ့ မြို့တွေအားလုံးမှာ နေ့လှည့်ကင်း၊ ရပ်ကင်းနဲ့ ညပိုင်းမှာလည်း လှည့်ကင်း၊ ရပ်ကင်းတွေကို အင်အားတိုးပြီးတော့ ပိတ်ဆို့ရှာဖွေနေပါတယ်’ ’ဟု ရဲမှူးကြီး အောင်မြတ်မိုးက ပြောသည်။
အများပြည်သူ လုံခြုံရေးအတွက် မြို့တိုင်းတွင် ရှာဖွေမှုများ ဆက်လက် လုပ်ဆောင်သွားမည်ဖြစ်ပြီး ပြည်သူများ အနေဖြင့် ပတ်ဝန်းကျင်တွင် မသင်္ကာစရာများ တွေ့ရှိပါက မြန်မာနိုင်ငံရဲတပ်ဖွဲ့သို့ ဖုန်းဆက် သတင်းပေးခြင်းဖြင့် ပူးပေါင်းပါဝင်နိုင်ကြောင်း ထုတ်ပြန်ထားသည်။
ပြည်သူများအနေဖြင့် သတင်းမှန်သည်ဖြစ်စေ၊ မှားသည်ဖြစ်စေ သတင်းပေးစေလိုပြီး သတင်းပေးသူ မည်သူ မည်ဝါဖြစ်သည်ကို ထုတ်ဖော်ပြောဆိုသွားမည် မဟုတ်ကြောင်း ရဲမှူးကြီး အောင်မြတ်မိုးက ဆက်ပြောသည်။
ရှမ်းပြည်နယ်မြောက်ပိုင်းတွင် ၂၀၁၆ ခုနှစ် ဖေဖော်ဝါရီလအတွင်း ဖြစ်ပေါ်နေသော မီးဘေး၊ စစ်ဘေးများ၊ ပေါက်ကွဲမှုများ အဆက်မပြတ် ဖြစ်ပေါ်နေသော အခြေနေအရပ်ရပ် တို့ကြောင့် လားရှိုးမြို့တွင်း ဖောက်ခွဲမှုများ ဖြစ်ပေါ်လာမည်ကို ဒေသခံများက စိုးရိမ်နေကြကြောင်း သိရသည်။
“ဒီလထဲမှာ ဖြစ်နေတာတွေက အရမ်းကြောက်ဖို့ ကောင်းနေတယ်။ နမ့်ဆန်မှာ မီးလောင်တယ်။ တော့စန်မှာ တိုက်ပွဲတွေဖြစ်လို့ စစ်ရှောင်တွေ အများကြီး ဖြစ်ကုန်တယ်။ အခုရက်မှာလည်း ကွမ်းလုံကားလမ်း ပေါ်မှာ ဗုံးပေါက်ကွဲတယ်။ ဒေသတောင်ယာ လုပ်သားတွေ တောင်ယာတွေ ဝန်းကျင် မသွားရဲတော့ဘူး။ လားရှိုးမြို့ထဲကို ဝင်ပြီး ဖောက်ခွဲရေးတွေ လုပ်မှာကို စိုးရိမ်နေကြတာပါ’’ ဟု လားရှိုးဒေသခံ ကိုထွန်းထွန်းက ပြောသည်။
ရှမ်းပြည်နယ်မြောက်ပိုင်း ကျောက်မဲမြို့ တော့စန်ကျေးရွာအနီး ဝန်းကျင်တွင် ဖေဖော်ဝါရီလ ၇ ရက်မှ စတင်ကာ ဖြစ်ပွားနေသော တိုက်ပွဲများနှင့် ကွမ်းလုံ- ချင်းရွှေဟော် ပြည်ထောင်စု လမ်းမကြီးတွင် ပေါက်ကွဲမှု နှစ်ကြိမ် ဖြစ်ပွားခြင်း၊ လားရှိုးမြို့နှင့် ၁၂ မိုင်သာ ဝေးသော ၁၂ မိုင်ကုန်းဆင်းတွင်လည်း ပေါက်ကွဲမှု နှစ်ကြိမ်ဆက်တိုက် ဖြစ်ပွားခဲ့ကြောင်း သိရသည်။
သတင်း - MMK
The Ladies News
0 comments:
Post a Comment