ကျောက်ဖြူ၊ နိုဝင်ဘာ ၄
အမျိုးသား ဒီမိုကရေစီအဖွဲ့ချုပ် နာယက ဦးတင်ဦး က ကျောက်ဖြူမြို့နယ် လူထုနှင့် တွေ့ဆုံရာတွင် အမျိုးသား ဒီမိုကရေစီအဖွဲ့ချုပ်၏ဆန္ဒမှာ ရခိုင်ပြည်နယ်မှာ အုပ်ချုပ်သူ အကြီးအကဲသည် ရခိုင်အမျိုးသား သာ ဖြစ်ရမည်ဟု ပြောကြားသည်။
ကျောက်ဖြူမြို့၊ သာသနာ့ဗိမာန်တွင် နိုင်ဝင်ဘာလ(၄)ရက်နေ့ နံနက် ၈ နာရီ ၃၀ မိနစ်ခန့်က ရွေးကောက်ပွဲ မဲဆွယ်စည်းရုံးရေး ဟောပြောပွဲတွင် အမျိုးသား ဒီမိုကရေစီအဖွဲ့ချုပ် နာယက ဦးတင်ဦး ကပြောဆိုခဲ့ခြင်း ဖြစ်သည်။
“ ကျနော်တို့စိတ်ထဲမှာ ရခိုင်လူမျိုးနဲ့ ကျနော်တို့ ဗမာဟာ ဒင်္ဂါး တစ်ပြားတည်းလို့ သဘောထားပါတယ်။ တန်းတူ ညီမျှခွင့်ရှိရမယ်။ ကိုယ်ပြည်နယ်မှာ ကိုယ့်ပါတီအုပ်ချုပ်ခွင့်ရှိရမယ်။ ကိုယ့်ကြမ္မာကို ဖန်တီးခွင့်ရှိရမယ်။ ခင်ဗျားတို့ တောင့်တနေတဲ့ အုပ်ချုပ်သူ အကြီးအကဲဟာ ရခိုင်ဖြစ်ရမယ်။ ရခိုင်ပြည်နယ်မှာဆိုရင် အုပ်ချုပ်တဲ့ ခေါင်းဆောင်ဟာ ကျနော်တို့ရဲ့ ဆန္ဒအရဆိုရင် ရခိုင်အမျိုးသား ဖြစ်ရမယ်” ဟု ဦးတင်ဦး ကပြောဆိုသည်။
ထို့အပြင် အမျိုးသားဒီမိုကရေစီအဖွဲ့ချုပ် နာယက ဦးတင်ဦးက “ မဲပေးတဲ့အခါ ဟိုလူအားနာ၊ ဒီလူအားနာ ဆိုပြီး အားနာနာနဲ့ မဲမပေးကြဖို့ ကျွန်တော် တိုက်တွန်းလိုပါတယ်” ဟု ပြောဆိုသည်။
“ မဲဆွယ်စည်းရုံးတဲ့ အခါ ပေးထားတာတွေ ကျွေးထားတာလည်း ရှိနေတယ်။ ပေးရင်ယူလိုက်ပါ။ အလှူအတန်း လုပ်တယ်လို့ပဲ သဘောထားကြပါ။ မဲပေးတဲ့အခါ စဉ်းစားချင့်ချိန်ပြီး မှန်မှန်ကန်ကန် မဲပေးကြပါ” ဟု သူက ဆိုသည်။
အမှတ်(၁၀)အ မျိုးသားလွှတ်တော် နေရာမှ ၀င်ရောက်ယှဉ်ပြိုင်မည့် အမျိုးသားဒီမိုကရေစီအဖွဲ့ချုပ် မှ လွှတ်တော်ကိုယ်စားလှယ်လောင်း ဦးခင်မောင်ဖြူ ကလည်း “ ကျနော် လွှတ်တော်ကိုယ်စားလှယ်ဖြစ်ခဲ့ရင် အဂတိတရား ကင်းရှင်းအောင် ဆောင်ရွက်ပါမယ်။ ကျနော်တို့ အမျိုးသားဒီမိုကရေစီအဖွဲ့ချုပ်က နိုင်ငံရေး လုပ်စားဖို့ ၀င်လာတာမဟုတ်ပါ။ နိုင်ငံရေးလုပ်ဖို့ ၀င်လာတာပါ။ ပြည်သူ့ ခိုင်းဘက်ပါ။ ကျနော် ကျောက်ဖြူမြို့နယ်မှာ ကျွန်ခံရပါစေ” ဟု ပြောသည်။
ဟာသလူရွှင်တော် မေတ္တာ ကလည်း “ ဥပဒေ ဆိုတာ မလိုတစ်မျိုး လိုတစ်မျိုး မဖြစ်ရဘူး။ ဥပဒေဆိုတာ ခြေဖ၀ါးလို တသမတ်တည်းဖြစ်ရမယ်။ ဒီလိုဖြစ်မှသာ အခြားသော တိုင်းပြည်တွေက ရင်းနှီးမြှုပ်နှံမှုတွေ လာမယ်” ဟု ပြောဆိုခဲ့သည်။
ကျောက်ဖြူတွင် ပြုလုပ်သော အမျိုးသားဒီမိုကရေစီအဖွဲ့ချုပ်၏ မဲဆွယ် စည်ရုံးပွဲသို့ ကျောက်ဖြူမြို့ခံ ၆၀၀ကျော်ခန့် တက်ရောက်ခဲ့သည်။
ကျော်ဝင်း
Arakan State
https://www.facebook.com/NarinjaraNews
0 comments:
Post a Comment