မကြာသေးခင်ကမှ ကျင်းပခဲ့တဲ့ ၂၀၁၄ - ၂၀၁၅ အကယ်ဒမီပေးပွဲ ဂယက်နဲ့ပတ်သက်ပြီး မင်းသွေးနဲ့တွေ့ဆုံခိုက်မေးမြန်းဖြစ်ခဲ့ပါတယ်။ သရုပ်ဆောင်တစ်ဖြစ်လဲ အဆိုတော်မင်းသွေးက ၂၀၁၆ သင်္ကြန်ကိုတော့ အိမ်မှာပဲကုန်ဆုံးဖြစ်ဖို့များနေသလို လက်ရှိသင်္ကြန်နဲ့ပတ်သက်တဲ့ လူမှုကွန်ယက်ပေါ်က အသံများနဲ့ပတ်သက်ပြီး သူ့အမြင်ကိုတီးခေါက်ကြည့်မိတဲ့အခါ
-ဒီနှစ်သင်္ကြန် ဘယ်မှာရှိမလဲ သိချင်ပါတယ်။
သင်္ကြန်ကတော့ အခုလောလောဆယ်အထိကတော့ ရန်ကုန်မှာပဲ ရှိဖို့များမယ် ခင်ဗျ။ အိမ်မှာပဲ နေဖြစ်ဖို့များမယ်။ ဘာသာရေးပိုင်းကို ဦးစားပေးလုပ်ဖြစ်မယ်။ အိမ်မှာနေဖြစ်မယ်ဆိုရင်ပေါ့။
-အရင်နှစ်တွေတုန်းကရော သင်္ကြန်ကိုဘယ်လိုဖြတ်သန်းဖြစ်လဲ။
အရင်နှစ်တွေတုန်းကတော့ သင်္ကြန်ကိုအိမ်မှာနေဖြစ်တာများတယ်။ အခုနောက်ပိုင်း နှစ်နှစ်၊ သုံးနှစ်ကတော့ နေပြည်တော် Ace မဏ္ဍပ်မှာဖျော်ဖြေရေးငှားတဲ့အတွက် အဲ့ဒီမှာဖျော်ဖြေဖြစ်တယ်။
-နှစ်ဆန်းတစ်ရက်နေ့ကိုရော ဘယ်လိုဖြတ်သန်းဖြစ်မလဲ။
နှစ်ဆန်းတစ်ရက်နေ့ကတော့ နှစ်တိုင်း အလှူလုပ်ဖြစ်တယ်။ အိမ်နားကဘုန်းကြီးကျောင်းမှာ အလှူလုပ်တယ်။
-ဒီနှစ်သင်္ကြန်မှာ တချို့နေရာတွေမှာ မဏ္ဍပ်မလုပ်ခိုင်းတာနဲ့ပတ်သက်ပြီး အစ်ကို့ရဲ့ အမြင်ကဘယ်လိုရှိလဲ။
ဖေ့စ်ဘုတ်ဆိုတာကတော့ အမှန်အတိုင်းပြောရရင် စာရေးရတာတော့ လွယ်ပါတယ်။ ဒါပေမဲ့ ကျွန်တော်ကိုယ်တိုင်လဲ မဏ္ဍပ်ထိုင်ဖူးတယ်။ ဒါပေမဲ့ အဲ့ဒီလောက်ကြီး ဆိုးဆိုးဝါးဝါးတော့ မဟုတ်ပါဘူး။ ထင်သလောက် ဆိုးဆိုးဝါးဝါးကြီးမဟုတ်ဘူး။ အခုပြည်လမ်းပေါ်မှာတော့ မဏ္ဍပ်ဆောက်ခွင့်ပေးပြီးပေါ့။ ထိန်းထိန်းသိမ်းသိမ်းလေးနဲ့ပျော်ကြပါပေါ့။ မဏ္ဍပ်ဆောက်တဲ့သူတွေအနေနဲ့လဲ လျှပ်တပြက်စစ်ဆေးတာမျိုး၊ နောက်လမ်းပေါ်ကလူငယ်တွေကို နည်းနည်းပါးပါးထိန်းသိမ်းပေးတာမျိုး၊ စည်းကမ်းပိုတင်းကြပ်ပြီး အရင်နှစ်တွေကလိုပဲ ပျော်ပျော်ပါးပါးလေးဖြတ်သန်းရင်တော့ပိုကောင်းမယ်လို့မြင်ပါတယ်ခင်ဗျ။
-မြန်မာနှစ်သစ်လဲရောက်ပြီ။ အစိုးရသစ်လဲပြောင်းသွားပြီဆိုတော့ အဲ့ဒီအပေါ်မှာရော အစ်ကို့ရဲ့ အမြင်ကဘယ်လိုမျိုးရှိလဲ။
ပြည်သူထဲကပြည်သူတစ်ယောက်၊ အနုပညာလုပ်နေတဲ့ အနုပညာသမားတစ်ယောက်အနေနဲ့စိတ်ခံစားချက်လေးကိုပြောပြချင်တယ်။ အခုဆိုရင်ထားပါတော့ ဒေါ်စုကအစ ကျန်တဲ့သမ္မတတော်တော်များများ လုံခြုံရေးကိစ္စတွေမယူကြဘူးပေါ့။ စက်ဘီးနဲ့သွားကြတယ်။ ပြည်သူတွေနဲ့တန်းတူရှိတာကိုပြတယ်ပေါ့လေ။ ဒါပေမဲ့ အမှန်အတိုင်းပြောရရင် လူတစ်ယောက်မှာ ထားပါတော့ဗျာ။ ခိုင်းနှိုင်းပြီးပြောတာတော့မဟုတ်ဘူး။ ဘုန်းကြီးတစ်ပါးဆိုရင်တောင် ၀တ်နည်းရှိတယ်ဗျာ။ ၁၂နာရီနောက်ပိုင်းကို ဘုန်းပေးလို့မရဘူး။ ၁၂ နာရီအရှေ့ပိုင်းကိုပဲ ဘုန်းပေးလို့ရတယ်။ ၀တ်နည်းပေါ့လေ။ အဲ့ဒီလိုမျိုးပဲ။ သမ္မတတစ်ယောက်အနေနဲ့လဲ လုံခြုံရေးနေသင့်တဲ့ အနေအထားရှိတယ်။ သူ့ရာထူးနဲ့သူတော့ဖြစ်စေချင်ပါတယ်။ ပြောလို့မရဘူးလေနော့။ ကျွန်တော်တို့ဗိုလ်ချုပ်အောင်ဆန်းလဲ ပြည်သူတွေသူ့ဖက်မှာ ရှိတယ်။ သူ့ကို ချစ်ခင်ကြပါတယ်ဆိုပြီး လုံခြုံရေးကိုမယူခဲ့ဘူး။ အဲ့ဒါကြောင့်လဲ ကျွန်တော်တို့မထင်မှတ်တာတွေဖြစ်သွားခဲ့တယ်။ ကျွန်တော်အဲ့ဒီလိုဖြစ်မယ်လို့မဆိုလိုပါဘူး။ ဖြစ်သွားခဲ့သည်ရှိသော် အခုတည်ဆောက်ထားတဲ့ လက်ရှိအစိုးရသည် နည်းနည်းနောနော တည်ဆောက်လာခဲ့ရတာမဟုတ်ဘူးလေ။ နှစ်ပေါင်းတွေလဲအများကြီးဆိုတော့ တစ်ခုခုအတိမ်းအစောင်းလေးဖြစ်သွားမှာ ကိုကျွန်တော်ပြည်သူတစ်ယောက်အနေနဲ့စိုးရိမ်မိပါတယ်။ အဲ့ဒါကြောင့် ရသင့်တဲ့အခွင့်အရေးကို ယူကြပါပေါ့။ ပြည်သူတွေကသူတို့ရသင့်တဲ့ အခွင့်အရေးယူလို့လဲဘာမှပြောမှာမဟုတ်ဘူးလေ။ ကျွန်တော်တစ်ယောက်တည်းရဲ့ခံစားချက်ကိုပြောပြတာပါ။ ရသင့်တဲ့အခွင့်အရေးကို အသုံးချပါ။ ပြည်သူတွေကိုလဲ ဒီ့ထက်ပိုပြီးစောင့်ရှောက်ကြပါ။ ပြည်သူတွေကိုဆင်းရဲတွင်းကနေလွတ်အောင်လဲကြိုးစားပေးကြပါလို့။ ရသင့်တဲ့အခွင့်အရေးကိုလဲ ကောင်းကောင်းမွန်မွန်လေးနဲ့လုံလုံခြုံခြုံလေးသွားလာတာကိုတော့ဖြစ်စေချင်ပါတယ်။
-အကယ်ဒမီပေးပွဲမှာ အစ်ကိုဖြစ်တဲ့ မောင်နေတိုး အကယ်ဒမီရသွားတဲ့အပေါ် ညီဖြစ်တဲ့ အစ်ကို့ရဲ့ စိတ်ခံစားချက်လေးကိုလဲသိချင်ပါတယ်။
အမှန်အတိုင်းပြောရရင် ရသင့်တာကြာပါပြီ။ ကျွန်တော်ကိုယ်တိုင်လဲသူ့ကို အဲ့ဒီဇာတ်ရုပ်နဲ့ပဲရစေချင်တယ်။ ဘာလို့လဲဆိုတော့ သူရိုက်နေကျကားတွေနဲ့ကာရိုက်တာကွဲတယ်လေနော့။ သူပြောသွားသလိုပါပဲ။ အဲ့ဒီအကယ်ဒမီရုပ်ထုလေးက သူ့ပရိသတ်တွေရဲ့ နှလုံးသားပါပေါ့။ သူနဲ့ထပ်တူပျော်ပါတယ်။ သူကြိုးစားဖို့အတွက်အားအင်တွေပိုရှိသွားစေတယ်လို့ပဲမြင်ပါတယ်ခင်ဗျ။
-အကယ်ဒမီပေးပွဲပြီးသွားတဲ့အချိန်မှာ ထွက်ပေါ်လာတဲ့ တစ်ယောက်တစ်ပေါက်ဝေဖန်မှုတွေနဲ့ပတ်သက်ပြီး အစ်ကို့ရဲ့ အမြင်လေးကိုလဲသိချင်ပါတယ်။
ဒါကတော့ အမှန်အတိုင်းပြောရရင် သွေးပူတုန်းပြောကြတဲ့ စကားတွေပါ။ သိပ်ထွေထွေထူးထူးပြောစရာတော့မရှိပါဘူး။ အနုပညာညီအစ်ကိုတွေကတော့ ချစ်ချစ်ခင်ခင်ပဲနေသွားရမှာပဲလေ။ ဒါကတော့ သွေးပူတုန်းခဏပါ။ ကြာသွားရင်မေ့သွားကြမှာပါ။
-မောင်နေတိုးအနေနဲ့ ရတဲ့အကယ်ဒမီဆုနဲ့ပတ်သက်ပြီး အလှူတွေဘာတွေလုပ်ဖို့အစီအစဉ်ရှိလားလဲသိချင်ပါတယ်။
သေချာပါတယ်။ လုပ်ဖြစ်မှာပါ။ သူကအခုဒီကြားထဲမှာ အလုပ်ကလဲများနေ သင်္ကြန်ကလဲခံနေတော့ ဘယ်မှာလုပ်ဖြစ်မလဲဆိုတာမသိသေးဘူး။ ဒါပေမဲ့လုပ်ဖြစ်မှာပါ။ ကျွန်တော်လဲသူနဲ့မတွေ့ဖြစ်သေးတော့မပြောဖြစ်သေးတဲ့အတွက်အတိအကျမသိသေးဘူး။ လုပ်ဖြစ်မှာပါ။
-ဆံပင်ကရော အရှည်ပဲထားမှာလား။
ကျွန်တော်၅လပိုင်းမှာကိုသားညီနဲ့ဗီဒီယိုတစ်ကားရိုက်ဖို့ရှိတယ်။ အဲ့ဒီကားအတွက်ဆံပင်ကိုမညှပ်သေးတာပါ။ ၅လပိုင်းပြီးရင်တော့ ညှပ်ဖြစ်ဖို့များပါတယ်။
-၂၀၁၆ သင်္ကြန်နဲ့ပတ်သက်ပြီး ပရိသတ်ကြီးကို ဆုတောင်းစကားလေးပြောပေးပါဦး။
သင်္ကြန်ဆိုတာကတော့ အမှန်အတိုင်းပြောရရင် ထူးဆန်းတဲ့ပွဲတော်ကြီးပါ။ ဒီလောက်ပူပြင်းတဲ့ အချိန်မှာရေပက်ကြတယ်။ ဘာမှထွေထွေထူးထူးမဖြစ်ဘူး။ ခိုက်ရန်ဖြစ်ပွားလို့နည်းနည်းပါးပါးထိခိုက်ဒဏ်ရာရကြတာပဲရှိတယ်။ ဒီနှစ်ကတော့ သာမန်နှစ်တွေထက်ပူတယ်။ ဒီဂရီက လေးဆယ်ကျော်ဆိုတော့ အရမ်းပြင်းတယ်။ နေပူဒဏ်ကိုကာကွယ်ကြပါ။ ပြီးတော့ အရင်နှစ်တွေကထက်ပိုပြီး ထိန်းထိန်းသိမ်းသိမ်းလေးနဲ့ပျော်ကြပါးကြပါလို့။ ဘာလို့လဲဆိုတော့ သင်္ကြန်ဆိုတာ ချစ်စရာကောင်းတဲ့ ရိုးရာဓလေ့လေ။ အလွန်အကျူးတော့မဖြစ်ကြပါနဲ့လို့ အရက်တွေလဲလျှော့သောက်ကြပါ။ အရမ်းပူတယ်လေ။ ကျန်းမာရေးဂရုစိုက်ပြီး အန္တရယ်ကင်းကင်းနဲ့ပျော်နိုင်ကြပါစေလို့ဆုတောင်းပေးလိုက်ပါတယ်။
ခင်ဆွေသက်
Trend Myanmar
www.trend.com.mm
0 comments:
Post a Comment