နေပြည်တော် ဧပြီ ၂၀
နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည်သည် ဧပြီ ၂၂ ရက် မွန်းလွဲ၂ နာရီတွင် နိုင်ငံခြားရေး ဝန်ကြီးဌာန၌ မြန်မာနိုင်ငံ ဆိုင်ရာ ပြည်တွင်းပြည်ပ အခြေစိုက် သံတမန်များနှင့် တွေ့ဆုံ ၍ မြန်မာ နိုင်ငံ၏ နိုင်ငံခြားရေးမူဝါဒနှင့် စပ်လျဉ်းပြီး ရှင်းလင်းပြောကြား မည်ဖြစ်ကြောင်း နိုင်ငံခြားရေး ဝန်ကြီးဌာန နိုင်ငံရေးရာ ဦးစီးဌာနမှ ဒုတိယညွှန်ကြားရေးမှူးချုပ် ဦးကိုကိုရှိန်ကပြောကြားသည်။
သံတမန်တွေနဲ့ တွေ့ဆုံရှင်းလင်းပွဲကို တက်ရောက်ဖို့ ရန်ကုန်မြို့ အခြေစိုက်သံရုံး ၄၆ ရုံး၊ ကုလသမဂ္ဂဌာနေ ကိုယ်စားလှယ်ရုံး တစ်ရုံးနဲ့ ပြည်ပအခြေစိုက်သံရုံး ၄၆ ရုံး စုစုပေါင်း ၉၃ ရုံးကို ဖိတ်ကြားခဲ့ရာမှာ ယနေ့ အချိန်အထိ သံရုံး ၇၃ ရုံးမှ ပါဝင်တက်ရောက်ကြမယ်လို့ ပြန်ကြားထားပါတယ်။ အဲဒီမှာ သံအမတ်ကြီးများ သို့မဟုတ် ဒုတိယသံရုံး အကြီးအကဲများ ပါဝင် တက်ရောက်ကြ မှာ ဖြစ်ပါ တယ်ဟု ဒုတိယညွှန်ကြားရေးမှူးချုပ် ဦးကိုကိုရှိန်က ပြောကြားသည်။
မြန်မာန်ိုင်ငံရဲ့ နိုင်ငံခြားရေးမူဝါဒဟာ မိမိနိုင်ငံရဲ့ အမျိုးသားအကျိုး စီးပွားကို ကာကွယ်စောင့်ရှောက် ဖော်ဆောင်တာဖြစ်ပြီး အမျိုးသားလုံခြုံရေး၊ အမျိုးသား စီးပွားရေး ဖွံ့ဖြိုးတိုးတက်ရေး၊ တရားမျှတပြီး တည်ငြိမ် အေးချမ်းတဲ့ ကမ္ဘာ့ ပတ်ဝန်းကျင် တိုးတက်ဖြစ်ထွန်းရေးကို ဦးတည်ထားရှိပါတယ်။ လွတ်လပ် မှု၊ အချုပ်အခြာ အာဏာ ပိုင်ဆိုင်မှု၊ ကိုယ်ပိုင်ယဉ်ကျေးမှုနဲ့ ဓလေ့ထုံးတမ်းအစဉ် အလာများကိုအလေးထားမှု၊ တိုင်းရင်းသား စည်းလုံး ညီညွတ်ရေးကို အလေး ထားမှုစတဲ့ အချက်တွေကို တန်ဖိုးထားတဲ့ မူဝါဒဖြစ်ပါတယ်။
ကျွန်တော်တို့နိုင်ငံဟာ အနာဂတ်နိုင်ငံတော် ဒီမိုကရေစီ တည်ဆောက် ရေး လုပ်ငန်းတွေ၊ နိုင်ငံရေး၊ စီးပွားရေး၊ လူမှုရေး ဖွံ့ဖြိုးတိုးတက်ရေး ကြိုးပမ်း အားထုတ်မှုတွေ၊ မိမိပြည်တွင်းရေး လိုအပ်ချက်တွေကို ပြည်ပနိုင်ငံ တကာရဲ့ စံချိန်စံညွှန်းတွေနဲ့ ညှိနှိုင်းမှုတွေပြုလုပ်ပြီး အပြန်အလှန် အားဖြင့် နိုင်ငံ တကာ ဖြစ်စဉ်တွေကနေပြီး မိမိနိုင်ငံ ပြည်တွင်းရေး သက်ရောက်မှုတွေ ကို စောင့်ကြည့်လေ့လာကာ အမျိုးသားရေး အကျိုးစီးပွားနဲ့ ယှဉ်ပြီး ရပ်တည် ဆောင်ရွက်ခြင်းတွေကို ဆက်လက်ဖော်ဆောင်လျက် ရှိပါတယ်ဟု မြန်မာနိုင်ငံ၏ နိုင်ငံခြားရေး မူဝါဒနှင့် ပတ်သက်၍ ၎င်းက ဆက်လက်ပြောကြားသည်။
ထိုသို့ဆောင်ရွက်ရာတွင် ယခင်ကကဲ့သို့ သာမန်နှစ်နိုင်ငံဆက်ဆံရေး (bilateral relation) တိုးတက်ခိုင်မာရေး ဦးတည်ချက် တစ်ခုတည်း သာမဟုတ် တော့ဘဲ ဒေသတွင်းနိုင်ငံများနှင့် ပေါင်းစပ်ပြီး (regional integration) နှင့် နိုင်ငံတကာပူးပေါင်းဆောင်ရွက်ရေး (multilateralism) တို့ကိုလည်း ပိုမိုပြီး နိုးကြားတက်ကြွစွာ ပူးပေါင်း ဆောင်ရွက်ရန် ဖြစ် လာကြောင်း၊ ထို့ကြောင့် ASEAN၊ ASEAN +3၊ ACMECS၊ CLMV၊ BIMSTEC၊ LMI၊ GMS၊ ACD၊ Mekong-Lancang၊ Mekong-Korea နဲ့ Mekong-Japan စသည့် ဒေသဆိုင်ရာ အဖွဲ့အစည်း များနှင့်လည်း ပူးပေါင်းပြီးဆောင်ရွက်နေကြောင်း ဒုတိယညွှန်ကြားရေးမှူးချုပ် ဦးကိုကိုရှိန်က ဆက်လက် ပြောကြား သည်။
မြန်မာနိုင်ငံ၏ နိုင်ငံခြားရေးမူဝါဒသည် ၂၀၀၈ ခုနှစ် ဖွဲ့စည်းပုံအခြေခံ ဥပဒေပုဒ်မ ၄၁ အရ လွတ်လပ်၍ တက်ကြွပြီး ဘက်မလိုက်သော နိုင်ငံခြားရေး ဝါဒကို ကျင့်သုံးလျက်ရှိပြီး ငြိမ်းချမ်းစွာ အတူယှဉ်တွဲ နေထိုင်ရေး မူကြီး (၅) ရပ်ဖြစ်သည့် တစ်နိုင်ငံ၏ နယ်မြေတည်တံ့မှုနှင့် အချုပ် အခြာအာဏာ ပိုင်ဆိုင်မှုကို တစ်နိုင်ငံက လေးစားရန်၊ တစ်နိုင်ငံနှင့်တစ်နိုင်ငံ ကျူးကျော် တိုက်ခိုက်မှု မပြုလုပ်ရန်၊ တစ်နိုင်ငံနှင့်တစ်နိုင်ငံ ပြည်တွင်းရေး ကိစ္စများတွင် ဝင်ရောက် စွက်ဖက်ခြင်းမပြုရန်၊ တစ်နိုင်ငံနှင့် တစ်နိုင်ငံ တန်းတူ ရည်တူ ရှိရန်နှင့် နှစ်ဦး နှစ်ဖက်အကျိုးဖြစ်ထွန်းစေရန်နှင့် ငြိမ်းချမ်းစွာ အတူယှဉ် တွဲနေထိုင်ရန် အချက် များကို အခြေခံပြီး လုပ်ငန်းစဉ် (၈)ရပ် ချမှတ် ကျင့်သုံးလျက်ရှိသည်။
နိုင်ငံခြားရေးဝန်ကြီး ဒေါ်အောင်ဆန်းစုကြည်က မိမိတို့အစိုးရ သည် နိုင်ငံခြားရေး မူဝါဒအရ တစ်ကမ္ဘာလုံးနှင့် ခင်မင်ရင်းနှီးစွာဖြင့် ငြိမ်းချမ်းရေးအတွက် ဆောင်ရွက်သည့်နေရာတွင် အိမ်နီးချင်းနိုင်ငံများကလည်း ပူးပေါင်း ဆောင်ရွက်မည်ဟု ယုံကြည်ပါကြောင်း ဧပြီ ၅ ရက်တွင် တရုတ်ပြည်သူ့သမ္မတနိုင်ငံ နိုင်ငံခြားရေးဝန်ကြီး မစ္စတာဝမ်ယိအား လက်ခံတွေ့ဆုံရာ၌ ထည့်သွင်း ပြောကြားခဲ့ခြင်းသည် မြန်မာနိုင်ငံ၏ အစဉ်အဆက် ကျင့်သုံး ခဲ့သော နိုင်ငံခြားရေး မူဝါဒကို ထင်ဟပ် ဖော်ပြလျက် ရှိသကဲ့သို့ မြန်မာနိုင်ငံခြားရေး မူဝါဒမှာ ပိုမို၍ သွက်လက် လှုပ်ရှား လာခဲ့ရာ ဧပြီ ၂၂ ရက်တွင် သံတမန်များနှင့်တွေ့ဆုံရှင်းလင်း နိုင်ခြင်းအားဖြင့် နိုင်ငံတော် ဖွံ့ဖြိုး တိုးတက်ရေးနှင့် အမျိုးသားအကျိုးစီးပွား မြင့်မားရေး အတွက် မြန်မာ့နိုင် ငံခြားရေး မူဝါဒဖြင့် မြှင့်တင် သွားနိုင် မည်ဖြစ်သည်။
MOI Webportal Myanmar
https://www.facebook.com/MOIWebportalMyanmar
0 comments:
Post a Comment