 |
| ရေဘေးသင့် ဒေသ တချို့မှာ ရေပြန်ကျပေမဲ့ အခက်အခဲတွေ ရှိနေသေး |
ဟင်္သာတ၊ ဇလွန် စတဲ့ မြို့တွေမှာ သြဂုတ်လ ၅ ရက်နေ့လယ်ပိုင်း တိုင်းထွာချက်အရ ဧရာဝတီ မြစ်ရေ စိုးရိမ်ရေမှတ်ထက် ၃ ပေ ဝန်းကျင် ကျော်လွန်နေပါတယ်။
လာမယ့် နှစ်ရက် အတွင်း နောက်ထပ် ပေ ဝက်လောက် ထပ်တက် နိုင်တယ်လို့လည်း မိုးလေဝသနဲ့ ဇလဗေဒ ဦးစီးဌာနက သတိပေးထားပါတယ်။
သြဂုတ်လ ၄ ရက်နေ့က လိမ္မော်ရောင် အန္တရာယ် အဆင့် သတ်မှတ်ထားတဲ့ ညောင်တုန်း မြို့မှာ ဒီအဆင့်အတိုင်း ဆက်ရှိနေပါတယ်။
ညောင်တုန်း မြို့နယ်ထဲက ရေဘေးသင့် သပြုရေလည် အုပ်စု ရွှေဒင်္ဂါးကျွန်း ကျေးရွာက မိသားစုတွေကို ရွာမှာ ထားခဲ့ပြီး ညောင်တုန်းမြို့ပေါ်မှာ ကယ်ဆယ်ရေး အကူအညီ ရဖို့ လာရောက် တောင်းခံနေတဲ့ ဒေါ်စန်းမြိုင်က သူတို့ရွာမှာ အိမ်ခြေ ၁၅၀ ရေမြုပ်နေပြီး ဘာအကူအညီမှ မရဘူးလို့ ဘီဘီစီကို ပြောပါတယ်။
ညောင်တုန်း မြို့နယ်ထဲမှာ ငါးသန်ချောင်း ၊ ကျိန်ချောင်း ၊ စက္ကော့ စတဲ့ ရွာတွေ လွန်ခဲ့တဲ့ ၁၅ ရက်လောက်ကတည်းက ရေမြုပ်နေတာ ဖြစ်ပါတယ်။
ကျေးရွာ အုပ်ချုပ်ရေးမှူးကတော့ သူတို့ ဒေသမှာ ရွာအုပ်စုပေါင်း ၂၀ လောက် ရေဘေးဒဏ် ခံနေရတယ်လို့ ခန့်မှန်းရပြီး လူဦးရေ တစ်သောင်းလောက် အတိဒုက္ခ ရောက်နေတယ်လို့ ပြောပါတယ်။
သြဂုတ် လဆန်းတုန်းက တနာရီကို နှစ်လက်မ နှုန်းနဲ့ ရေတက်ခဲ့တဲ့ ဇလွန်မြို့မှာ တော့ သြဂုတ်လ ၅ ရက်နေ့က ရေဆက်မတက်ဘဲ တန့်နေတယ်လို့ ဒေသခံ တစ်ယောက်က ပြောပါတယ်။
အလားတူ ဟင်္သာတမြို့နယ် ခင်ဖုန်း အုပ်စုထဲက ရွာတွေမှာ ဆိုးဆိုးရွားရွား ရေမြုပ်နေပြီး အိမ်ခြေ ၂၀၀ ကျော်လောက် ရေဘေးဒဏ် ခံနေရတာကြောင့် သာသနာ့ လင်္ကာရ ကျောင်းတိုက်ထဲမှာ လူ ၄၀၀ လောက်ကို လက်ခံပြီး ကယ်ဆယ်ရေးစခန်း ဖွင့်ထားရပါတယ်။
မြန်မာ နိုင်ငံ မိုးလေဝသနဲ့ ဇလဗေဒ ဦးစီးဌာန ဒုတိယ ညွှန်ကြားရေးမှူး ဦးလှထွန်းက ဧရာဝတီမြစ် အထက်ပိုင်း ရေဘေးသင့် ဒေသတွေမှာ မိုးနည်းသွားပြီး ရေအနည်းငယ် ကျသွားတဲ့အတွက် အဆိုးရွားဆုံး အခြေအနေကနေ ကျော်သွားပြီလို့ ဆိုနိုင်တဲ့အကြောင်း ပြောပါတယ်။
ဒါပေမဲ့ ဧရာဝတီ မြစ်ဝကျွန်းပေါ်ဒေသမှာ မုတ်သုံလေ ဆက်ရှိနေသေးတဲ့ အတွက် မိုးဆက်ရွာနိုင်တယ်လို့ သူက ပြောပါတယ်။
ရခိုင်ပြည်နယ်မှာတော့ မုတ်သုံလေ အားနည်းသွားပြီး မိုးနည်းသွားပြီလို့ သူက ပြောပါတယ်။
BBC Burmese
http://www.bbc.com/burmese
0 comments:
Post a Comment