တာချီလိတ်မြို့ ၀ိန်းကျောက်ရပ်ကွက် တော်ကော့တွင်းရှိ ရာအိမ်မှူးရုံး၌ ပြုလုပ်သည့် အစည်းအဝေးမှ ပြန်လာသော ဆယ်အိမ်မှူးတစ်ဦး လမ်းတွင် သေနတ်ဖြင့် ပစ်သတ်ခံရမှု ဇန်န၀ါရီလ(၁၄)ရက် ညပိုင်းက ဖြစ်ပွားကြောင်း သိရသည်။
စည်ပင်အိမ်အခွန်ကောက်ခံသည့် ကိစ္စနှင့် ပတ်သက်၍ ဆွေးနွေးအပြီး ည(၉)နာရီအချိန်တွင် ရုံးခန်းများ ပိတ်၍ အိမ်ပြန်သွားပြီး မိနစ် (၃၀)ခန့်အကြာတွင် ဆယ်အိမ်မှူး ဦးစိုင်းကျောက်မှာ သွေးအိုင်ထဲတွင် လဲကျနေကြောင်း ရာအိမ်မှုးနှင့်အဖွဲ့ထံ သတင်းရောက်လာခြင်းဖြစ်ကြောင်း သိရသည်။
ဦးစိုင်းကျန်က ၎င်း၏ အိမ်ရှေ့တွင် လူတစ်ဦးသွေးအိုင်ထဲ လဲနေကြောင်း ရာအိမ်မှူး ဦးအိုက်ကျော်နှင့် အဖွဲ့အား သွားရောက်အသိပေးသဖြင့် ရာအိမ်မှူးနှင့်အဖွဲ့သည် သေဆုံးသူအား ကြည့်ရှုစစ်ဆေးရာမှ ဆယ်အိမ်မှူး ဦးစိုင်းကျောက် ဖြစ်နေကြောင်း သိရသည်ဟု ဆိုသည်။
"အိမ်ရှေ့မှာ အမည်မသိ လူတစ်ဦး သွေးအိုင်ထဲ လဲနေတာကို တွေ့လို့ ရာအိမ်မှူးကို အကြောင်းကြား လိုက်တာကနေ သတ်ခံရတဲ့လူဟာ ဆယ်အိမ်မှူးဖြစ်နေမှန်း သိရတာလို့ သိရတယ်ဗျ၊ လွယ်အိတ်ထဲမှာလည်း စည်ပင်အခွန် ကောက်ထားတဲ့ ငွေတွေလည်း ပါတယ်လို့ ပြောတယ်။ သေနတ်သံတော့ မကြားလိုက်မိဘူး.."ဟု တော်ကော့တွင်းနေ အမျိုးသား တစ်ဦးက ပြောသည်။
အသက်(၃၁)နှစ်အရွယ် ဆယ်အိမ်မှုး ဦးစိုင်းကျောက်သည် ၀ဲနားထင်ဖောက်ဝင် ဒဏ်ရာ (၁)ချက်၊ ယာဂျိုဇောင်း ဖောက်ထွက် ဒဏ်ရာ (၁)ချက်၊ နဖူးတွင် (၁)လက်မခန့် ပေါက်ပြဲဒဏ်ရာ (၁)ချက်တို့ ရရှိထားပြီး သွေးအိုင်ထဲတွင် လဲကျသေဆုံးနေခြင်း ဖြစ်ကြောင်း ရဲစခန်း၏ မှတ်တမ်းများအရ သိရသည်။
သေဆုံးသူ၏ လွယ်အိတ်အတွင်း၌ စည်ပင်အခွန်အဖြစ် ကောက်ခံရရှိထားသည့် ထိုင်းဘတ်ငွေ (၁၂,၄၉၀)ဘတ် နှင့် မြန်မာ ကျပ်ငွေ(၅၂၈,၃၀၀)ကျပ်တို့အား တွေ့ရှိရပြီး အနီးတွင် ကျည်ဆံအခွန်ကိုလည်း တွေ့ရှိရကြောင်း သိရသည်။
အဆိုပါ ဖြစ်စဉ်နှင့် ပတ်သက်၍ တာချီလိတ်မြို့မရဲစခန်းတွင် (ပ)၁၇/၂၀၁၆ ပြစ်မှု ပုဒ်မ ၃၀၂ဖြင့် အမှုဖွင့်လှစ် ဆောင်ရွက်နေကြောင်း သိရသည်။
ယခုအမှု အပါဝင် ဇန်န၀ါရီလ (၂)ပတ်အတွင်း တာချီလိတ်မြို့မရဲစခန်းတွင် ပြစ်မှုပေါင်းစုံ (၁၇)မှု အမှုဖွင့်လှစ် ထားရှိကြောင်း သိရသည်။
Tachileik News Agency
http://www.tachileik.net/2016/01/tkd.html
0 comments:
Post a Comment