ဖြစ်စဉ်မှာ တာမွေဂိတ်ရင်းသို့ မောင်းနှင်လာသည့် ပါရမီ ၁၇၄ ယာဉ်လိုင်းမှ ယာဉ်အား မီးပွိုင့်မိနေချိန်တွင် ယာဉ်နောက်လိုက်မှ ယာဉ်ကို မရွေ့စေရန် တုံးခုနေချိန်၌ အမျိုးသားငါးဦးခန့်က ကားရှေ့မှန်အား ပစ်ခွဲပြီး ယာဉ်ပေါ်မှ ဆင်းလာသည့် စပါယ်ယာတစ်ဦးကို ဓာတ်ဆီဖြင့် လောင်းကာ ယာဉ်နှင့်အတူတွဲ၍ မီးရှို့ခဲ့ခြင်းဖြစ်ကြောင်း ကိုယ်တိုင် မြင်တွေ့ခဲ့ရသူများ၏ ပြောကြားချက်အရ သိရှိရသည်။
ထိုကဲ့သို့ အကြမ်းဖက် တိုက်ခိုက်ခဲ့သူများက ကျန်ရှိသော ယာဉ်နောက်လိုက် တစ်ဦးနှင့် ဒရိုင်ဘာကို ယာဉ်ပေါ်အထိ တုတ်နှင့် လိုက်ရိုက်သဖြင့် ခရီးသည် အမျိုးသမီးတစ်ဦး၏ မျက်နှာကို ရိုက်နှက်မိခဲ့သဖြင့် မျက်နှာနှင့် နှုတ်ခမ်းတွင် ဖူးရောင် ပေါက်ပြဲ ဒဏ်ရာ ရရှိသွားခဲ့ကြောင်း မျက်မြင်တွေ့သူ ခရီးသည်များက ပြောကြားသည်။
လူတစ်စုမှ အကြမ်းဖက်တိုက်ခိုက်၍ ယာဉ်ပေါ်အထိ လိုက်လံရိုက်နှက်ချိန်တွင် ၁၇၄ ယာဉ်လိုင်းပေါ်တွင် ခရီးသွားပြည်သူ ၅၀ ခန့် ပါဝင်လာပြီး အဆိုပါ ခရီးသည်များအနက် ခရီးသည် အမျိုးသမီး တစ်ဦးမှာ မူးလဲသွားပြီး ကျန်ခရီးသည် အမျိုးသမီး တစ်ဦးမှာ မျက်နှာတွင် ဒဏ်ရာရရှိခဲ့သည့် အတွက် သွေးမေတ္တာ သွေးလှူအသင်း၏ လူနာတင်ယာဉ်ဖြင့် ရန်ကုန်ဆေးရုံကြီးသို့ တင်ပို့ကုသခဲ့ရကြောင်း သိရသည်။
“၁၇၄ ယာဉ်က မီးပွိုင့်မှာ မီးနီမိလို့ ဘီး နောက်မလိမ့်အောင် တုံးခုနေချိန်မှာ လူတစ်စုက ကားရှေ့မှန်ကို ပစ်ခွဲလိုက်တယ်။ ပြီးတော့ ဆင်းသွားတဲ့ မဲမဲ၀၀လူကို ဓာတ်ဆီနဲ့ ပက်ပြီး ယာဉ်ကိုတွဲပြီး မီးရှို့ပစ်လိုက်တယ်။ မီးလောင်ခံရတဲ့သူက တာမွေအ၀ိုင်းထိပ် မှတ်တိုင်ဘက်ကို ထွက်ပြေးလာပြီး တစ်ကိုယ်လုံးမှာ လောင်နေတဲ့ အ၀တ်အစားတွေနဲ့ ဦးထုပ်ကို ချွတ်ချပြီး ကိုယ်တုံးလုံးကြီး ထွက်ပြေးသွားတယ်။ နောက် စပါယ်ယာ ကောင်လေးကို တစ်ယောက်က “မင်းတို့လားကွ ငါတို့ကို ပြောတာ”ဆိုပြီး ပါးပိတ်ရိုက်လိုက်တယ်။ ကားပေါ်က ဒရိုင်ဘာကို တစ်ယောက်က သံတုတ်နဲ့ တက်ရိုက်တယ်။ အဲ့ဒီအချိန်မှာ အမျိုးသမီးတစ်ယောက် မျက်နှာထိသွားတယ်။ အဲ့ဒီအချိန်မှာ ကျွန်တော်တို့ ခရီးသည်တွေအတွက် ကမ္ဘာပျက်နေသလိုပဲ။ အကြမ်းဖက် တိုက်ခိုက်တဲ့ လူက ကားအ၀င်တံခါးမှာ သံတုတ်နဲ့ ပိတ်ရိုက်နေတော့ သူ့သံတုတ်ကို ရှောင်နေရတဲ့ အချိန်မှာ ကားခေါင်းထိပ်မှာက မီးလောင်နေတယ်။ ကားက စီအန်ဂျီယာဉ်ဆိုတော့ မီးလောင်ပေါက်ကွဲရင် ခရီးသည်အားလုံး ဒုက္ခရောက်ကုန်နိုင်တယ်”ဟု ပါရမီ ခရီးသည်တင်ယာဉ်ပေါ်တွင် လိုက်ပါခဲ့သော ခရီးသည် တစ်ဦးက ဆိုပါသည်။
“၁၇၄ ယာဉ်ကို လူငါးယောက်လောက်က အေးအေးဆေးဆေး ထိုင်စောင့်ပြီးမှ စပါယ်ယာတွေ ဒရိုင်ဘာတွေကို အပိုင်စောင့်ရိုက်ပြီး ဓာတ်ဆီလောင်း မီးရှို့တာပါ။ ခရီးသည်တွေ အကုန်လုံး ဆင်းပြေးရတယ်။ ကျွန်တော်က ရွှေဂုံတိုင်ကနေ တက်တာ။ ကားက မြောက်ဒဂုံကို ဆက်သွားမှာ။ တာမွေတင် ဂိတ်ဆုံးမဲ့ ၁၇၄ မဟုတ်ဘူး။ နောက်ပြီးတော့ အကြမ်းဖက် တိုက်ခိုက် မီးရှို့ခံရတဲ့ ယာဉ်ပေါ်မှာလည်း သံတုတ်တွေ၊ တုတ်ချောင်းတွေ ၄ ချောင်း၊ ၅ ချောင်းလောက် တွေ့ရတယ်။ သူတို့ချင်း ရန်ငြိုးရှိလို့ စောင့်ရိုက်တာ အဖြစ်နိုင်ဆုံးပဲ။ ည ၉ နာရီလောက် အချိန်ဆိုတာက အရမ်းစောနေသေးတဲ့ အချိန်ပါ။ ဒီလိုအချိန်မှာ မင်းမဲ့စရိုက်ဆန်ဆန် အကြမ်းဖက် တိုက်ခိုက်တာက အရမ်းကြီးကို ရုပ်ပျက် ဆင်းပျက် နိုင်လွန်းပါတယ်” ဟု မျက်မြင်တွေ့ရှိသူ တစ်ဦးဖြစ်သည့် တာမွေမြို့နယ်၊ မေတ္တာညွန့် ရပ်ကွက်တွင် နေထိုင်သူ အသက် ၂၈ နှစ်အရွယ် အမျိုးသား တစ်ဦးက ပြောကြားသည်။
အဆိုပါ ဖြစ်စဉ်တွင် ရဲတပ်ဖွဲ့ဝင်များ ရောက်ရှိလာသည့် အချိန်၌ ရိုက်နှက်ခံရသည့် ၁၇၄ ယာဉ်မှ ယာဉ်နောက်လိုက် နှစ်ဦး၊ ဒရိုင်ဘာနှင့် အကြမ်းဖက် တိုက်ခိုက်သူများ မရှိတော့ဘဲ မျက်မြင်သက်သေ အချို့သာ ကျန်ရှိနေသည်။ ဖြစ်ပွားရသည့် အခြေအနေများနှင့် အမှုအခြေအနေမှာ တိုက်ခိုက်ခံရသည့် ဒရိုင်ဘာနှင့် စပါယ်ယာများအား တွေ့ရှိမှသာ သိရှိရမည်ဖြစ်ကြောင်း ဗဟန်းမြို့မ ရဲစခန်းမှ တာဝန်ရှိသူများ၏ ကနဦး ပြောကြားချက်အရ စုံစမ်းသိရှိရသည်။
“ကျွန်တော့်ဒရိုင်ဘာနဲ့ စပါယ်ယာမှာ ဘာရန်ငြိုးမှတော့ မရှိပါဘူး။ ကျွန်တော်လည်း အခုမှသိလို့ ရောက်လာတာ” ဟု အခင်းဖြစ်ပွားခဲ့သော ပါရမီ ၁၇၄ ယာဉ်လိုင်းမှ ယာဉ်၏ ပိုင်ရှင်ဖြစ်သူက ပြောကြားခဲ့ပါသည်။
(ဓာတ်ပုံ – ကြည်နိုင်)
Source: Eleven Media
About Editor
0 comments:
Post a Comment