အနုပညာလောကထဲမှာ နှစ် ၃၀ နီးပါးဖြတ်သန်း လာသလို အများနဲ့ မသက်ဆိုင်သောသူ ဇာတ်ကားနဲ့ ဇာတ်ပို့ဆုကို ရရှိခဲ့တဲ့ ခင်မို့မို့အေးက အခုချိန်ထိလဲ ပရိသတ်အားပေး လက်ခံနေဆဲ ဇာတ်ကားတွေ ရိုက်နေရဆဲဖြစ်သလို ဗီလိန်ဆန်တဲ့ ကာရိုက်တာတွေနဲ့အတူ အမြဲတွေ့နေရတဲ့ သရုပ်ဆောင်တစ်ယောက်ပါ။ သူမရဲ့ အနုပညာရေးရာများနဲ့ သူမဖြတ်သန်းခဲ့တဲ့ အနုပညာခရီးလမ်း တစ်လျှောက်ကို ပြန်ပြောင်းမေးကြည့်တဲ့အခါ
"တီတီတို့စရိုက်တုန်းကဆို ကားကြီးခေတ်ပေါ့။ နောက်မှ ဗီဒီယိုပေါ်လာတယ်။ တီတီတို့စရိုက်တုန်းက မင်းသမီးနှစ်ယောက် ဇာတ်လေးတွေပေးရိုက်ကြတယ်။ တီတီက ဒီလောကထဲကို စ၀င်တုန်းက အိမ်ထောင်သည်ဖြစ်နေပြီ။ အဲ့ဒီတုန်းက တီတီအချစ်ခန်းတွေ ရိုက်ရတာ အရမ်းအခက်တွေ့ခဲ့တယ်။ အိမ်ထောင်သည်ဆိုတော့ ပါးစပ်မရဲဘူး။ ရှက်တယ်ပေါ့။ ကြောက်လဲကြောက်တယ်။ အဲ့ဒီတော့ ဆရာက နင့်ကို အချစ်ခန်းရိုက်နေတာ သရဲကားရိုက်နေတာ မဟုတ်ဘူးပေါ့။ ဆရာတွေက သင်လဲသင်ပေးတယ်။ ဆုံးလဲဆုံးမတယ်။ နောက်တစ်ခုရှိတာ တီတီက ဗီလိန်ဇာတ်ရုပ်တွေရိုက်ရတာလဲများခဲ့တယ်။ ကောင်းတာလူမသိပေမဲ့ ဆိုးတာကျတော့ လူသိတယ်။ ခင်မို့မို့အေးဆို ဗီလိန်များတယ်။ ဗီလိန်ဇာတ်ရုပ်ဆိုတာလဲ တီတီရွေးချယ်ခဲ့တာမဟုတ်ဘူး။ ဒါရိုက်တာကချပေးတဲ့ ဇာတ်ရုပ်ပေါ့။ ဗီလိန်လား။ လူကောင်းလား။ တီတီမခွဲခြားတတ်ဘူး။ ရိုက်ကာစက နားမလည်ခဲ့ဘူး။ သူတို့ချပေးတဲ့ ဇာတ်ရုပ်ကိုပဲ တီတီရိုက်ပါတယ်။ အရမ်းပီပီပြင်ပြင်ဖြစ်သွားရတဲ့အကြောင်းက ဒါရိုက်တာက အမူအရာကအစ အကုန်သင်ပေးတယ်။ သင်ပေးတဲ့အတိုင်း လုပ်တဲ့အတွက် ဗီလိန်ဇာတ်ရုပ်တွေမှာ အရမ်းပီပြင်သွားတာပါ။ နောက်ပိုင်းမှာလဲ အဲ့ဒီလိုဇာတ်ရုပ်တွေကိုပဲ တီတီတော်တော်များများ ရိုက်ခဲ့ပါတယ်။ ပြောရမယ်ဆို ပန်းနုသွေးမှာပေါ့။ ဇာတ်လဲကြိုရထားတဲ့အတွက် ခံစားချက်ကို ကြိုထည့်ထားလို့ရတယ်။ ဆင်းန်ပေါ်ရိုက်တဲ့အချိန်မှာ သိပ်ပြင်ဆင်စရာမလိုပဲ ဗီလိန်ဇာတ်ကို အကောင်းဆုံးသရုပ်ဆောင်နိုင်ခဲ့တယ်။ နောက်အခု အသက်အရွယ်ရလာတဲ့အခါမှာ ဗီလိန်ဇာတ်တွေလဲရိုက်သလို မိဘနဲ့ပတ်သက်တဲ့ ကားလေးတွေ၊ ဘ၀တစ်လျှောက်ရုန်းကန်ရတဲ့ဇာတ်လေးတွေကို ရိုက်လာခဲ့ရတာပါ"လို့ သူမက ပြောပြခဲ့ပါတယ်။
ခုလတ်တလောမှာ ခင်မို့မို့အေးဟာ တစ်နပ်စား ဆိုတဲ့ဇာတ်ကားကို မြင့်မြတ်၊ အိချောပိုတို့နဲ့အတူ ရိုက်ကူးနေတယ်လို့ သိရပါတယ်။
Trend Myanmar
trend.com.mm
0 comments:
Post a Comment