ပြည်သူမပေးတဲ့ အာဏာကို ကိုင်ထားတာဟာ အမျိုးသားနိုင်ငံရေး မဟုတ်ကြောင်း ဒေါ်အောင်ဆန်းစုကြည်မှ ပြောကြား

 အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်သည် အောက်တိုဘာလ(၂၁)ရက် နေ့လည်ပိုင်းက တာချီလိတ်မြို့ ဆေခမ်းရပ်ကွက်ရှိ ရှမ်းစာပေနှင့်ယဉ်ကျေးမှုအသင်းပိုင် ကွင်းတွင် လူထုဟောပြောပွဲ ပြုလုပ်သွားရာ ပြည်သူမပေးတဲ့ အာဏာကို ကိုင်ထားတာဟာ အမျိုးသားနိုင်ငံရေးနှင့် မဆိုင်ကြောင်း   ဒေါ်အောင်ဆန်းစုကြည်မှ ပြောကြားသွားသည်။

"အမျိုးသားဒီမိုကရေစီအဖွဲ့ချုပ်ကို တိုက်ခိုက်သော အားဖြင့် ပါတီနိုင်ငံရေးနဲ့ အမျိုးသားနိုင်ငံရေး ဆိုတာဟာ မတူဘူးဆိုပြီးတော့ ၀ါဒဖြန့်ချီကြပါတယ်၊ တကယ်တော့ ပါတီနိုင်ငံရေးဆိုတာဟာ လက်တွေ့ကျကျ လုပ်တဲ့ နိုင်ငံရေးပါပဲ၊ ကိုယ်ကနေပြီးတော့ အာဏာကိုင်ထားလို့ ကိုယ့်ကိုယ်ကို အမျိုးသားနိုင်ငံရေး လုပ်ပါတယ်လို့ သတ်မှတ်ထားလို့ မရပါဘူး၊ ပြည်သူမပေးတဲ့ အာဏာကို ကိုင်ထားတာဟာ အမျိုးသားနိုင်ငံရေးနဲ့ မဆိုင်ပါဘူး"ဟု ဟောပြောပွဲတွင် ပြောကြားသွားခြင်းဖြစ်သည်။

ဆက်လက်၍ နေရာလုခြင်းနှင့် ပတ်သက်ပြီး"နေရာလုတဲ့ ကိစ္စဆိုတာ အင်မတန်မှ ဆိုးတယ်၊ တစ်ယောက်နဲ့ တစ်ယောက် နေရာပေးချင်တဲ့ စိတ်နဲ့လုပ် သွားမယ်ဆိုရင် အေးအေးချမ်းချမ်းနဲ့ ဖြစ်သွားမှာပါ၊ ဒီမိုကရေစီ စနစ်ဆိုတာဟာ နေရာ မလုရအောင်လို့ ထွင်ထားတဲ့ စနစ်ဖြစ်တယ်၊ ပြည်သူက ပေးတဲ့နေရာပဲ ယူရတယ်၊ ကိုယ်က အာဏာရှိတိုင်း လက်နက်ရှိတိုင်း ပိုက်ဆံရှိတိုင်း နေရာလုလို့မရတဲ့ စနစ်ဖြစ်ပါတယ်.."ဟု ဒေါ်အောင်ဆန်းစုကြည်က ဟောပြောပွဲတွင် တာချီလိတ်ဒေသခံများကို ပြောကြားသွားသည်။

နံနက်ပိုင်းတွင် ဒေါ်အောင်ဆန်းစုကြည်မှ တာချီလိတ်မြို့မိမြို့ဖများနှင့် တွေ့ဆုံခဲ့သည့် နှင့် ပတ်သက်၍"ဟောပြောပွဲကို မလာခင်မှာ တာချီလိတ် မြို့မိမြို့ဖများနဲ့ အရင်ဆုံးတွေ့ခဲ့ပါတယ်၊ မြို့မိမြို့ဖများဟာ ဘယ်လိုမျှော်လင့်ချက်တွေရှိလဲ၊ ဘယ်လိုစိုးရိမ်စိတ်တွေ ရှိလဲဆိုတာကို ကျွန်မမေးကြည့်တဲ့ အခါကြတော့ စီးပွားရေးနဲ့ ပတ်သက်လို့ အခက်အခဲတွေရှိနေတဲ့ အကြောင်းအရင်းတွေထဲမှာ ဘဏ်စနစ် မမှန်မကန်တာတွေ ပါပါတယ်၊ အခွန်အကောက်စနစ် မမှန်ကန်တာတွေလည်း ပါပါတယ်၊ အုပ်ချုပ်ရေးပိုင်းဆိုင်ရာတွေလည်း အဂတိ လိုက်စားတာလည်း ပါပါတယ်၊"ဟု ဟောပြောပွဲတွင် ထည့်သွင်း ပြောကြားသွားသည်။

ဒေါ်အောင်ဆန်းစုကြည်သည် တာချီလိတ်သို့ အောက်တိုဘာလ(၂၁)ရက် နံနက်ပိုင်းက ရောက်ရှိလာတာဖြစ်ပြီး နေ့လည်ပိုင်းမှာ လူထုဟောပြောပွဲ ပြုလုပ်ကာ၊ အောက်တိုဘာလ(၂၂)ရက်နေ့ နံနက်ပိုင်းတွင် တာချီလိတ်မှ တဆင့် မိုင်းဖြတ်၊ ကျိုင်းတုံသို့ ဆက်လက်ထွက်ခွာမှာဖြစ်ပြီး အဆိုပါ မြို့တို့တွင် လူထုဟောပြောပွဲများ ပြုလုပ်သွားရန် စီစဉ်ထားကြောင်း သိရှိရသည်။

Tachileik News Agency
http://www.tachileik.net/2015/10/DASSK3.html

Share on Google Plus

About Editor

This is a short description in the author block about the author. You edit it by entering text in the "Biographical Info" field in the user admin panel.