 |
| တအောင်းဝ် TNLA တပ်သားများ။ |
အခုဆိုရင် ကချင်ပြည်နယ်၊ ရှမ်းပြည်နယ်၊ ပလောင်အပါအဝင် တိုင်းရင်းဒေသအချို့မှာ အစိုးရစစ်တပ်နဲ့ တိုင်းရင်းသားလက်နက်ကိုင် အဖွဲ့တွေကြား တိုက်ပွဲဖြစ်တဲ့အကြိမ်ရေ များလာနေပြီး စစ်ရေးတင်းမာမှုအရှိန်ကမြင့်တက်လာနေပါတယ်။ လက်ရှိတိုက်ပွဲတွေဖြစ်ပွားနေတဲ့ တိုင်းရင်းသားလက်နက်ကိုင်အဖွဲ့အစည်းတချို့ကို ချန်လှပ်ပြီးတော့ တနိုင်ငံလုံးအတိုင်းအတာနဲ့ အပစ်အခတ်ရပ်စဲရေး NCA စာချုပ်ကို လက်မှတ်မထိုးဘူးလို့ ပလောင်ပြည်နယ်လွတ်မြောက်ရေးတပ်ဦးကလည်း ဒီကနေ့ ကြေညာလိုက်ပါတယ်။ တအောင်းအမျိုးသား လွတ်မြောက်ရေး တပ်မတော်TNLA ပြောခွင့်ရ မိုင်းအိုက်ကျော်က-
“အပစ်ရပ်ဖို့ကတော့ ၁၅ ဖွဲ့နဲ့အရင်ထိုးမယ်၊ ကျန်တဲ့အဖွဲ့တွေ နောက်မှလိုက်ထိုး။ တချို့ကျတော့ ထိုးလို့မရသေးဘူး-တဲ့။ သူတို့က သဘောထားတွေ အမျိုးမျိုး ဆက်ရှိနေသေးတယ်။ ဘယ်အဖွဲ့ပဲကျန်ကျန် တိုက်ပွဲက ဆက်ဖြစ်နေလို့ရှိရင်တော့ -အစိုးရကတော့ - သူ့ရဲ့နာမည်ကိုက ‘တနိုင်ငံလုံးအပစ်အခတ်ရပ်စဲရေး’-လို့ ခေါ်တယ်။ ဒါပေမယ့် တချို့အဖွဲ့တွေကျတော့ ကျန်ခဲ့မယ်။ ဒါဆိုရင်တော့ တိုက်ပွဲတွေက တောက်လျှောက်ဖြစ်လာမယ်၊ တောက်လျှောက်ဖြစ်လာလို့ရှိရင်တော့ တနိုင်ငံလုံးအတိုင်းအတာနဲ့ အပစ်အခတ်ရပ်စဲရေး စာချုပ်လို့ မခေါ်နိုင်တော့ဘူး။”
ရှမ်းပြည်နယ်အတွင်းမှာလည်း ရှမ်းပြည်ပြန်လည်ထူထောင်ရေးကောင်စီ RCSS/ SSA တောင်ပိုင်းတပ်နဲ့ အစိုးရတပ်တို့ကြား တိုက်ပွဲတွေ ပြင်းထန်ခဲ့သလို မြန်မာတပ်ဘက်ကလည်း စစ်အင်အားတွေ တိုးချဲ့လာနေလို့ နယ်မြေအတွင်းမှာ စစ်ရေးတင်းမာမှုအရှိန်ကမြင့်နေဆဲ အနေအထားမှာဖြစ်နေတယ်လို့ SSA တောင်ပိုင်းတပ်က ဗိုလ်မှူးကြီးစိုင်းလကပြောပါတယ်။
“အစိုးရတပ်နဲ့ ကျနော်တို့တပ်ကတော့ တိုက်ပွဲတွေဖြစ်ဖို့ တိုက်ခိုက်ဖို့က ရာခိုင်နှုန်းများတယ်-လို့ ကျနော်တို့ အဲလို သုံးသပ်နိုင်ပါတယ်။ ကျေးလက်ဒေသမှာ စစ်ကြောင်းတွေ၊ တိုက်ကင်းတွေ မြို့ပြမဟုတ်တဲ့နေရာမှာ လှု့်ရှားနေတာကို ကျနော်တို့ တွေ့ရပါတယ်။ စစ်ကြောင်းထွက်လာတာ ပိုများတယ်။ နယ်မြေလုံခြုံရေး၊ နယ်မြေရှင်းလင်းရေးအတွက်လည်း စီမံချက်နဲ့ ပက်ထရို (Patrol) လှည့်နေတာ ပိုများလာတာကို ကျနော်တို့ တွေ့ရတယ်။ အဲဒါကြောင့် ကျနော်တို့တပ်တွေနဲ့ တောထဲမှာ တိုးမိဆုံမိပြီးတော့ တိုက်ပွဲဖြစ်ရခြင်းပဲ ဖြစ်ပါတယ်။ လူကြီးပိုင်းက အပစ်အခတ်ရပ်စဲရေးကိစ္စ ဆွေးနွေးနေကြတယ်။ ပြည်နယ်အဆင့်၊ ပြည်ထောင်စုအဆင့်မှာလည်း ကျနော်တို့ အပစ်အခတ်ရပ်စဲရေးတွေ သုံးကြိမ်တိုင်တိုင် လုပ်ခဲ့ပြီးပြီ။ သဘောတူညီချက်တွေလည်း သုံးဆယ့်တစ်ချက်တောင် ရခဲ့ပြီးပြီ။ သို့သော်လည်းပဲ ဒီနေ့ထက်ထိ တိုက်ပွဲပေါင်း ၂၀၀ လောက်နီးပါး ကျနော်တို့ ဖြစ်ခဲ့ရတယ်။ ယနေ့ထက်ထိ တိုက်ပွဲတွေလည်း ဖြစ်နေတယ်။ NCA ထိုးဖို့ဆိုတာက အသင့်ဖြစ်ပါပြီလို့လည်း ပြောပါတယ်။ ….ဆိုတော့ အပစ်အခတ်ရပ်စဲရေးလည်း လက်မှတ် ထိုးမယ်၊ ထိုးမယ်ဆိုပြီးပြောနေတဲ့ကြားမှာပဲ တိုက်ပွဲတွေကလည်း ဖြစ်ဖြစ်လာတယ်ဆိုတော့ နင်တို့တပ်သားတွေရဲ့ ယုံကြည်မှုကို ထိခိုက်စေတဲ့အနေအထားတော့ ရှိပါတယ်လို့ ပြောလို့ရပါတယ်။”
မြန်မာတပ်နဲ့ ကချင်လွတ်မြောက်ရေး KIA တပ်တို့ကြား တိုက်ပွဲတွေပြင်းထန်နေဆဲဖြစ်တဲ့ ကချင်ပြည်နယ် ဗန်းမော်ခရိုင် မန်စီနဲ့ မိုင်းခေါင် ဒေသတွေမှာတော့ နယ်မြေအတွင်း အစိုးရတပ်ဘက်က လုံခြုံရေးတင်းကျပ်ထားပါတယ်။ ဒါကြောင့် သွားလာရေးခက်ခဲနေတဲ့ စစ်ဘေးရှောင်ဒေသခံပြည်သူတွေအတွက် သက်ဆိုင်ရာတာဝန်ရှိသူတွေကို အကူအညီတောင်းခံဖို့ ကြိုးစားနေကြတယ်လို့ မိုင်းခေါင် ကျေးရွာတာဝန်ခံ ဦးဇဘောင်နော်ကပြောပါတယ်။
ရှမ်းပြည်တောင်ပိုင်း၊ TNLA အဖွဲ့နယ်မြေအတွင်း ကျေးရွာတစ်ရွာက ကလေးငယ်တစ်ဦး။
ရှမ်းပြည်တောင်ပိုင်း၊ TNLA အဖွဲ့နယ်မြေအတွင်း ကျေးရွာတစ်ရွာက ကလေးငယ်တစ်ဦး။
“အခုထိ လက်နက်ကြီးတော့ ထုတ်တုန်း၊ အခု နည်းနည်းထူးခြားလာတာကတော့ ကျနော်တို့ မိုင်းခေါင်အုပ်စုရဲ့ ရပ်ကွက်- အင်ခါနန်- လို့ ပြောပါတယ်။ အဲဒီရပ်ကွက်ကလူတွေက နေလို့မရတော့ဘူး။ အစိုးရစစ်တပ်ဘက်က မောင်းထုတ်ပြီးမှ အိမ်ကို တစ်ယောက်မှ မလာနဲ့ပေါ့-အဲလိုမျိုး ပြောနေပါတယ်။ အဲဒီမှာ မိုင်းထောင်ထားပါတယ်။ နွားတွေထွန်တဲ့နေရာမှာ မိုင်းထောင်ထားပါတယ်။ အဲဒါကြောင့် ရွာသားတွေကို အဲဒီကို မလာခိုင်းစေချင်တဲ့အလားအလာ ဖြစ်နေတယ်။ အခု လေတုံးကို သွားခွင့်မပြုတဲ့အနေအထားဖြစ်နေတယ်။ လေတုံးကိုသွားတဲ့လူ မျက်နှာမမြင်ချင်ဘူး-လို့ အဲလိုမျိုး ပြောပြီးမှ သူတို့က ပစ်သတ်လိုက်မယ်ဆိုပြီးမှ အဲလိုအနေအထားဖြစ်နေပါတယ်။ အဲဒါကြောင့် တအားတင်းမာနေတဲ့ အခြေအနေ ဖြစ်တယ်။ အုပ်ချုပ်ရေးမှူးရော၊ နာယကအဖွဲ့အစည်းတွေရော၊ ဘုန်းကြီးတွေရော၊ ဘာသာရေးသုံးဖွဲ့က ဆုံပြီးမှ အခု အစည်းအဝေးထိုင်နေပါတယ်။ အဲဒါ စစ်တပ်ကနေ ဘက်နက် ဆင်းမထိုးပေးဖို့၊ ရွာမှာ လက်နက်ကြီးမထိုးဖို့၊ ပြီးတော့ရွာမှာ ရမ်းပြီးမှ မပစ်ဖို့၊ အဲဒါတွေ ကျနော်တို့က ဒီမှာတာဝန်ကျတဲ့ တပ်ရင်းမှူးတွေကို ကျနော်တို့က အသနားခံဖို့အတွက် စီစဉ်နေပါတယ်။ မနက်ဖြန်….ဖို့အတွက် စီစဉ်ထားပါတယ်။ အဲဒါ အခြေအနေကတော့ နည်းနည်းတင်းမာလာမယ့် အခြေအနေ ဖြစ်နေတယ်။”
ဒီလိုမျိုးတိုင်းရင်းသားနယ်မြေတွေထဲက စစ်ရေးတင်းမာနေဆဲအခြေအနေတွေကြောင့် ဒေသတွင်းလုံခြုံရေးစိုးရိမ်ရလို့ ရွေးကောက်ပွဲ မဲဆွယ် စည်းရုံးရေးတွေ မလုပ်ဖို့ ဆက်ပြီးတော့ တားမြစ်ထားဆဲအနေအထားဖြစ်တယ်လို့လည်း RCSS/SSA တောင်ပိုင်းတပ်က ဗိုလ်မှုးကြီး စိုင်းလ က ပြောပါတယ်။
တအောင်းပလောင်အဖွဲ့အနေနဲ့ကတော့ ၂၀၀၈ အခြေခံဥပဒေကို အခြေခံထားတဲ့၂၀၁၅ ရွေးကောက်ပွဲကို မထောက်ခံပေမဲ့လို့ နယ်မြေထဲမှာ နိုင်ငံရေးပါတီတွေ လာရောက် မဲဆွယ်စည်းရုံးလှုပ်ရှားမှုတွေကို ကန့်ကွက်မှာမဟုတ်ဘူးလို့ဆိုပါတယ်။ ဒါပေမဲ့လို့ လူမျိုးတမျိုးနဲ့တမျိုး ပဋိပက္ခ ဖြစ်စေမယ့် ပလောင်လူမျိုးကို နှိမ့်ချပုတ်ခတ်စော်ကားတဲ့အသုံးအနှုံးနဲ့ ဟောပြောမှုတွေကိုတော့ လက်ခံမှာမဟုတ်ဘူးလို့ တအောင်း ပလောင်ဝ်တပ်ဘက်က ပြောပါတယ်။
ဒါကြောင့် အစိုးရဘက်က ပြည်ထောင်စုငြိမ်းချမ်းရေးဖော်ဆောင်ရေးကော်မတီနဲ့ တိုင်းရင်းသားလက်နက်ကိုင်အဖွဲ့ခေါင်းဆောင်တွေကြား တနိုင်ငံလုံးအပစ်ရပ်စာချုပ် NCA အပြီးသတ်ချုပ်ဆိုနိုင်ရေး ငြိမ်းချမ်းရေးကြိုးပမ်းချက်က အောင်မြင်ပါ့မလားဆိုတဲ့ စိုးရိမ်မှုတွေနဲ့အတူ တနိုင်ငံလုံးအတိုင်းအတာနဲ့ ကျင်းပဖို့ပြင်ဆင်နေတဲ့ လာမယ့်၂၀၁၅ ရွေးကောက်ပွဲမှာ စစ်ရေးတင်းမာနေတဲ့ တိုင်းရင်းဒေသတွေမှာ လွတ်လပ်ပြီး တရားမျှတမှုရှိတဲ့ရွေးကောက်ပွဲ ကျင်းပနိုင်ခြေရှိပါ့မလားဆိုတဲ့ မေးခွန်းတွေလည်း ထွက်ပေါ်လာနေပါတယ်။
မဆုမွန် / ဗွီအိုအေ (မြန်မာပိုင်း)
http://burmese.voanews.com
0 comments:
Post a Comment